لاہور (نوید انجم مغل)دی سپیریئر سکول سسٹم پاجیاں، رائے ونڈ روڈ لاہور میں تعلیمی سال کی تکمیل کے موقع پر سالانہ تقسیمِ انعامات کی ایک نہایت پروقار اور رنگا رنگ تقریب منعقد کی گئی۔ اس تقریب میں طلبہ و طالبات، اساتذہ، سماجی شخصیات اور والدین کی ایک کثیر تعداد نے شرکت کر کے تقریب کی رونق میں اضافہ کیا۔ سکول کے سبزہ زار کو دلہن کی طرح سجایا گیا تھا جہاں ہر طرف جوش و خروش کا ماحول دیدنی تھا۔
تقریب کا باقاعدہ آغاز تلاوتِ کلام پاک اور ہدیہ نعت ﷺ سے کیا گیا، جس کے بعد ننھے منھے بچوں نے ملک و قوم کی محبت سے سرشار ملی نغموں پر اپنے فن کا مظاہرہ کیا۔ اس موقع پر طلبہ کی جانب سے پیش کیے جانے والے مختلف ٹیبلوز تقریب کا خاص مرکز رہے۔ بچوں نے اپنی پرفارمنس کے ذریعے نہ صرف پاکستانی ثقافت کے رنگ اجاگر کیے بلکہ سماجی مسائل، تعلیم کی اہمیت اور والدین کے احترام کے موضوعات پر دلکش خاکے پیش کر کے حاضرین کو ورطہ حیرت میں ڈال دیا۔ خوبصورت لباس زیب تن کیے ہوئے ان ننھے فنکاروں کی اداکاری اور اعتماد کو والدین اور مہمانوں نے کھڑے ہو کر داد دی اور اسے سکول انتظامیہ کی بہترین تربیت کا نتیجہ قرار دیا۔
پروگرام کے دوسرے حصے میں تعلیمی و غیر نصابی سرگرمیوں میں سال بھر نمایاں کارکردگی دکھانے والے پوزیشن ہولڈر طلبہ میں انعامات تقسیم کیے گئے۔ سکول انتظامیہ اور مہمانِ خصوصی نے پوزیشن حاصل کرنے والے بچوں کو میڈلز، ٹرافیاں اور تعریفی اسناد سے نوازا۔ اس موقع پر والدین کے چہروں پر اپنے بچوں کی کامیابی پر فخر اور خوشی کے تاثرات نمایاں تھے، جبکہ سکول کے پرنسپل نے اپنے خطاب میں اساتذہ کی محنت اور طلبہ کی لگن کو سراہتے ہوئے کہا کہ سپیریئر سکول سسٹم کا مقصد محض کتابی علم کی فراہمی نہیں بلکہ بچوں کی ہمہ جہت شخصیت سازی ہے تاکہ وہ عملی زندگی میں ایک کامیاب شہری کے طور پر سامنے آ سکیں۔
تقریب کے اختتام پر پرنسپل اور انتظامیہ نے تمام والدین کا شکریہ ادا کیا جنہوں نے سکول پر اعتماد کا اظہار کیا اور بچوں کی تعلیم و تربیت میں اپنا بھرپور کردار ادا کیا۔ شرکاء نے تقریب کے بہترین انتظامات اور بچوں کی ذہنی و جسمانی نشوونما کے لیے سکول کے اقدامات کی تعریف کی اور اسے رائے ونڈ کے علاقے میں تعلیمی معیار کی بلندی کی جانب ایک اہم قدم قرار دیا۔ آخر میں ملک و قوم کی سلامتی اور بچوں کے روشن مستقبل کے لیے خصوصی دعا کی گئی۔
