قصور(سید خرم شاہ سے) ڈپٹی کمشنر محمدآصف رضا کی زیر صدارت ڈسٹرکٹ پرائس کنٹرول کمیٹی کا اہم اجلاس منعقد ہوا، جس میں ضلع بھر میں اشیائے ضروریہ کی قیمتوں، دستیابی اور گراں فروشی کی شکایات کا تفصیلی جائزہ لیا گیا۔اجلاس میں ایڈیشنل ڈپٹی کمشنر (جنرل)سید ایوب بخاری، ای اے ڈی اے، ڈسٹرکٹ آفیسر انڈسٹریز، پی ڈبلیو اینڈ ایم، سیکرٹری مارکیٹ کمیٹی، تاجر ایسوسی ایشن کے صدر، تاجروں کے نمائندوں اور کمیٹی ممبران نے شرکت کی۔ڈپٹی کمشنر نے اجلاس سے خطاب کرتے ہوئے کہا کہ حکومت پنجاب کی ہدایت کے مطابق عام آدمی کو ریلیف فراہم کرنا ضلعی انتظامیہ کی اولین ترجیح ہے۔اشیائے خوردونوش کی مقررہ نرخوں پر دستیابی کو ہر صورت یقینی بنایا جائے گا۔انہوں نے پرائس مجسٹریٹس کو ہدایت کی کہ وہ فیلڈ میں متحرک رہیں، روزانہ کی بنیاد پر مارکیٹوں کا دورہ کریں، ریٹ لسٹ کی چیکنگ کریں اور گراں فروشی میں ملوث عناصر کے خلاف فوری اور مو?ثر کارروائی عمل میں لائیں۔اجلاس کے دوران مختلف اشیاء کی موجودہ قیمتوں، سپلائی چین، منافع خوری اور صارفین کو درپیش مسائل پر بھی تبادلہ خیال کیا گیا۔ڈپٹی کمشنر نے تاجر برادری سے تعاون کی اپیل کرتے ہوئے کہا کہ عوامی مفاد کو مدنظر رکھتے ہوئے نرخ ناموں پر سختی سے عمل درآمد کیا جائے۔اجلاس میں تاجر تنظیموں کے نمائندوں، مارکیٹ کمیٹی کے عہدیداروں اور صارفین کے نمائندوں کی مشاورت سے مختلف اشیائے ضروریہ کی قیمتوں میں ضروری ایڈجسٹمنٹ کی گئی اور عوام کو ریلیف دینے کے لیے نئے نرخوں کو حتمی شکل دی گئی۔